Биектау районында коточкыч юл-транспорт һәлакәте аркасында Әтнә районы имамының абыйсы Наилә Сәгъдиева һәм аның хатыны һәлак булган.
Фаҗига 8 февраль көнне Каменка – Дөбъяз юлының 22 нче чакрымында булган. «Лада Гранта» автомобиле йөртүчесе каршы як полосага чыккан һәм Chery Tiggo машинасы белән бәрелешкән. Россиядә җитештерелгән автомобильдәге ир белән хатын алган җәрәхәтләрдән вакыйга урынында ук җан биргән.
Авыр югалту сәбәпле, Татарстан мөселманнары Диния нәзарәте җитәкчелеге, коллективы һәм имамнары Әтнә районы имам-мөхтәсибе Наил хәзрәт Сәгъдиевнең һәм аның гаиләсенең кайгысын уртаклашты.
— Татарстан Республикасы мөселманнары Диния нәзарәте коллективы Наил хәзрәт Сәгъдиевнең һәм аның якыннарының кайгысын уртаклаша. Аллаһы Тәгалә мәрхүмнәргә рәхим-шәфкатен бирсен, гөнаһларын кичерсен һәм җәннәткә керсен, — дип белдерделәр мөфтияттә.
